TIMU ZA UTEKELEZAJI MRADI WA BOOST ZAJENGEWA UWEZO

Posted on: December 16th, 2022

Timu za wataalamu kutoka ngazi ya Mkoa na Mamlaka za Serikali za Mitaa wanaosimamia utekelezaji wa mradi wa kuboresha elimu ya awali na msingi "BOOST" kutoka mikoa miwili ya Tanga na Kilimanjaro wamepewa mafunzo elekezi kwa lengo la kujengewa uwezo kuhusu usimamizi wa mradi wa BOOST.

Mafunzo kazi hayo ya siku mbili ambayo yameandaliwa na OR-TAMISEMI kwa kushirikiana na Wizara ya Elimu, Sayansi na Teknolojia kuanzia tarehe 16 hadi 17 Disemba, 2022 yamefanyika katika ukumbi wa shule ya sekondari ya Wasichana Korogwe na kuhudhuriwa na wajumbe wa timu za usimamizi kutoka katika Halmashauri za Mikoa husika.

Katika mafunzo kazi hayo Afua nane ziliwasilishwa ambazo ni :-

1. Uboreshaji wa miundombinu katika elimu ya awali na msingi
2. Uwekaji mazingira salama ya ufundishaji
3. Kuongeza uandikishaji wanafunzi katika elimu ya awali na msingi
4. Uboreshaji wa mazingira ya ufundishaji na maudhui
5. Uwezeshaji wa walimu katika mafunzo ya TEHAMA
6. Utoaji wa mafunzo endelevu kwa walimu mashuleni
7. Uwezo wa Halmashauri kuwezesha kifedha
8. Uongozi na utawala bora katika elimu

Aidha, lengo la mafunzo haya ni kuhakikisha na kuweka msisitizo kwa timu hizi kuhakikisha usimamizi wa mahitaji ya msingi na utekelezaji wa Afua unakamilishwa ili kukidhi vigezo vya kupata msaada wa kifedha kutoka Benki ya Dunia zitakazowezesha kupunguza na kuondoa changamoto mbalimbali za kielimu katika eneo la kujifunzaji na ufundishaji.

Imetolewa na:

Kitengo cha Mawasiliano Serikalini:

Halmashauri ya Wilaya ya Bumbuli